Samstag 9.August Heimreise

D nacht nach dr playersparty im Cafe de Beurs im Zentrum vo Rotterdam isch churz gsi. Mir si bi zyte uf u diräkt uf Shiphol ga ds gepäck ichecke, dass mer no es paar Stunde zyt hei ds Amsterdam.
Mir si aber aui nid gnue erholt gsi für langi sightseeingtoure. U es het het so viu lüt gha, dass me im touristestrom het müesse mitloufe-vilech isch e sunnige samstig ide summerferie nid so gschickt zum Amsterdam erkunde? Mir hei glich es paar egge vo dere spannende stadt mit irne sexshops u hanflädeli gseh. D bootstoure si üs ztüür gsi drum hei mer am kanal no chli nachegschlafe. Zum Glück, wiu wäg verspätetem flug, ersatzbusse zwüsche Genf Flughafe u Gare Cornavin, Extrazug im schnäggetempo vo Genf uf Lausanne, nomau 10 Minute verspätig uf fribourg bini am 3 ir nacht dert gstrandet. D eva isch mi cho hole u mir si am 4i todmüed is bett gheit.

Isch es spannends erläbnis gsi di EUG 2014. I fröiemi abr uf dehei, uf riibchäs, salatsauce u chli meh autonomie. Es isch no sträng geng ds 12. ungerwägs dsi.
Bi gspannt ufe Schulbeginn am mäntig...

Freitag 8. August Kleines Finale

Scho 10.30 hei mer dr chli final gäge di grosse holländerinne gspiut. Mir hei solid agfange u di beide erste sätz gwunne. Im 3.satz simer 23:19 vore gsi u d bronzemedaille isch üs scho fasch sicher gsi. Abr d holländerinne hei nid ufgäh u dä satz no 26:24 gwunne. O dr nächscht satz isch knapp a si. Im tiebreak hei mer üs dank starche service grad 4:0 chönne absetze u dä vorsprung nie meh abgäh. Mir hei 15:11 gwunne u si dritt ade European University Games 2014!

D jungs hei im chline final Frankrich 3:1 gschlage u si o dritt. Das git es grosses fescht hüt abe! D Uni Lausanne holt bronze bi de froue u manne u beidi MVP-title gö o ad Schwiz (Sarah von Rooij, Julien Carrel).

Donnerstag 7.August Halbfinal

Am morge hei mer nomau trainiert u när simer d schwitzer schütteler ga afüre. U drbi zimlech verschiffet worde. Zmittag, churzi siesta u widr id halle. D vorbereitig isch vorbiudlech gsi...

D serbinne hei dütlech stercher gspiut als ir vorrundi. Mir hei dr erst satz gwunne. Spetr ischs üs nümme glunge se am service unger druck ds setze. Iri passeuse het sech gar nid müesse bewege. Di serbischi libera het wäutklass gspiut u iri agrifferinne si o geng wi besser worde. Üsne schlüssuspielerinne hingäge ischs nüm glunge dr ball tot zmache. Ändi vierte satz simer nomau härecho: ufm fäud hei üsi müede lüt letschti reserve mobilisiert u mir hei dusse üsi stimmbänder arg beasprucht. Es het leidr nüm glängt u mir hei dä satz 24:26 u somit dr halbfinal 1:3 verlore.

Itz hei mer gar nid lang zyt dr chopf la zhange. Dr chli final findet scho morn 10.30 statt. Üsi gägnerinne si di grosse (aber vilech weniger flinke?) Holländerinne.

O d jungs vor Uni Lausanne hei ihre halbfinal 1:3 gäge Pole verlore u probiere morn am 11i gäge Frankrich di bronzemedaille heizhole.

Mittwoch 6.August Viertelfinal

Üsi trainer hei es footing vorem zmorge fürne gueti idee ghaute. Mir si nid grad übermotiviert gsi mit lärem buch ga ds jogge. Abr d morgestimmig am kanal isch schön gsi u mir när wach.

Üse viertifinal hie mer ir grössere haue dörfe spile. Mir si Porto physisch klar überläge gsi. Es hei immer d stamm 6 agfange u sobaud e solide vorsprung erspiut isch gsi hei mir uswächsuspieler ufs fäud dörfe.

O d Jungs hei ihre viertufinal 3:1 gäge Pole gwunne. Abr ire match isch wesentlech spannender gsi aus üse. D.h. morn spile froue u manne vor Uni Lausanne haubfinal!:-)

Am abe hei mer d bobbahn ufm campus usprobiert: Fürd EUG 2014 hei si e rampe mit schine u tartanbelag ufgsteut wome cha 2er-bobbne. Dä bob isch erstunlech schwär u es isch komisch i voller fahrt drizgumpe. bim erste mau hani gmeint er göng unger mir düre weni ir luft bi odr i landi uf mire hingerfrou. U am ändi vor rampe ischs hingertsi widr abe gange;-).  Sehr cool! Aber uf iis, mit naguschueh u kurve anstatt gradus ischs sicher no gfürchig.

Hie es video vo üsem bobversuech:

https://www.dropbox.com/s/uhwq91d3afml94x/VID-20140807-WA0006.mp4

Dienstag 5.August Ruhetag

Hüt isch ds ufstah nid aune liechtgfaue. Mir hei abr fürs training früeh abgmacht. Eigentlech hei mer vorhär o no üsi lutstarche schütteler wöue ga afüüre, abr ire match isch verschobe. Es hei o nid aui ruhetag hüt wiu si gestr abe hei matche annuliert. Am nami sige uffälligi propalästinenser ir haue xi u d organisatore hei angst gha, dass öpis passiert. Dr match Israel-Polen u aui glichzitige si drum annuliert u ds topsportzentrum schnällstmöglech grumt worde. D polizei het di verdächtige festgno u di matche wärde hüt nachegspiut.

U hüt hei mer müesse üse badge zeige für id halle u d zueschouer si äuä kotrolliert worde.

Üse trainer het nachem zmittag siesta verordnet u gmeint mir söue de nid 5 stung ds rotterdam umeloufe. Wahrschinlech o wiu er am morge festgstellt het, dass die einte chli weniger koordniert u sprützig si aus süsch. Bi chli ufm campus ad sunne gläge u ha vom wifi profitiert- so hetr das äuä nid gmeint abr i ha nid i üses mikrozimmer möge. Hie isches sunnig u agnähm warm sit mer letscht fritig acho si!

Mir hei zfuess Rotterdam erkundet u si glich zimlech wit gloffe. Rotterdam isch ganz en intressante mix us nöie wulchechratzer u töifere bachsteihüsli. Aber richtig aut si nur ganz wenigi gebäude, wiu fasch aues im 2.wäutchrieg zerbombt worde isch. Drfür het me d stadt so ziemlech nöi konstruiert. Es git unzähligi hafebecki u no meh verschideni schiff. U natürlech viu grossi idrücklechi brügge. Vorauem d erasmusbrug-ds wahrzeiche vor stadt- mit übername "dr schwan".

Montag 4.August

Ds letschte gruppespiu hei mer gäge Belgie gspiut. Di si ender chli schwächer als d Tschechinne vo gestr. Abr grad am afang isch bi üs nüt glunge u mir si zersch mau es paar punkt hingegläge. Schwirig dsägä ob di paar bier am vorabe, ds umehänge scho am morge ir turnhalle odr d tatsach dass mer nüm aus underdog  gäute a däm verpatzte matchbeginn tschuld si xi...

Mir si de doch no verwachet u hei zu üsem niveau u starche service zrüggfunge. So hei mer dä 1. Satz klar gwunne (25:17). O im zwöite hei mer gli gfüehrt, so dass dr Pierre sech sogar trout het mi uf dr mitti ineztue u d Sarah van Rooij uf usse ds ersetze. I ha o chli dörfe mini händli däm grosse belgische turm i wäg ha;-). Es isch nomau chli knapper worde abr o dä satz hei mer sicher heita (25:21). Im dritte satz het üses couchduo doch nüt wöue la abrönne u widr di 6 stammspilerinne ufgsteut. Di hei sech nomau chli müesse astränge (25:22)

Mir schliesse di gruppespiu auso ufm 1. Platz ab u spile übermorn dr viertufinal gäge ds chline u quirlige team vo Porto- we mer üs niid verrächnet hei. Dr turniermodus isch chli undurchsichtig.

Juppie hüt abe gömer ga chinesisch ässe. So chöi mer für einisch am Mensafood entgah u mit richtigem gschirr u bsteck ässe. U wahrschinlech gits sogar salatsauce! Nüt gäge di holländischi chuchi-stroopwaffel si super!

Dr abe hei mer mit öpfeler-cola am hafe la usklinge. Morn isch ja Ruhetag.

Sonntag 3. August

Mitem Zmorge hets hüt gäbig klappet, ganz ohni astah. Am morge hei mer no es stündli trainiert u mitti nami gäge serbie gspiut.

Bim ischlah hets ömu scho ganz schön tätscht u si si aui zimlech lang xi. Mir hei satz 1 u 3 gwunne, serbie satz 2 u 4-es ständigs hin- u här. Ds schwitzer fussballteam het üs ungloublech lutstarch agfüret u für stimmig gsorgt. Mir hei üs im tiebreak e chline vorsprung erspiut zum 12:9 u o vore rote charte gäge serbie profitiert. Trotzdäm si mer nomau i bedrängnis cho. Abr üsi poweragrifferin Sarah het no zwöi rückrumagriff versänkt u so hei mer dä krimi 16:14 gwunne u üs säubr zum 2. mau überrascht.

Hie es paar fotos:
https://www.dropbox.com/sh/bcg3ksry43191a7/AADPUhjIRv_j21V9FVrgj6Fwa

Samstag 2. August

Da mir ersch 15.30 gäge russland match hei si mer spät ga zmörgele. Aui angere athlete hei di glichi idee gha u mir si drum 50minute ir schlange vorem zmorgebuffet gstande. Di autoritäri securityfrou het üs iigscherft morn früecher zcho,wiu am 10ni laht si niemer me düre-egau wi lang me agstande isch.

Mir si mit dr iistellig i match, dass mer physisch unerläge si u dass jede punkt gfiiret wird. Ds vorsichtig formulierte ziel i üsere starche gruppe isch mit kampf beste dritte wärde u so witercho. Mir hei guet u konzentriert gspiut u gli gmerkt, dass mer chöi gwinne gäge di grosse abr flegmatische russinne. Si hei mässig abgno u irgendwie aues in zitlupe gspiut. Mir si gli wit vorus xi. Ds ganze spiu über hei si öppe jede  dritt service nid übers netz bracht. So hei mir klar 3:0 gwunne- wer hät das dänkt!

Am abe ir bar ufm riesige campus vor Erasmus University hei mer uf üse sieg gäge russland agstosse u di lauschige temperature u dr lang nordisch abe gnosse.

Freitag 1. August

Nachere lange reis mit verspätetem flüger, personeunfau u drum stou  im bahnhof rotterdam si mer äntlech acho. Di stadt xeht intressant us: mega subr u spannendi architektur! När si mer mau is wettkampfzentrum, abr dert het me üs wedr chönne säge wo mer wohne, no wo u wenn mir am nächste tag spile.d organisation vo däm riieseevent (1800 athlete) funktioniert noni ganz ribigslos.

Nach langem umewarte simer zersch mau ga trainiere is topsportzentrum- e grossi abr töifi haue mit gäube weiche wänd wi ire gummizäue.uff scho widr warte, ufe bus. schlafe, ässe u match/training isch a verschiedene ort u me mues drzwüsche dr EUG-bus näh wo zu unbekannte zite i 30-45minute intervall fahrt. Nachem gschmacklose mensafood hei mer doch no d uslosig vo üsere gruppe erfahre: russland, serbie,belgie u mir. Tja, das wird hert...

Äntlech hei mer üses gepäck dörfe absteue i üsne eher schäbige mikrozimmer:11m2 für zwöi lüt. Es isch nid möglech beidi koffer offe am bode zha. U d bettwösch hei mer zwar usem plastik uspackt abr si füehlt sech kartongig a u schmöckt so gut wi si usgseht. Di ungerkunft isch perfekt zum sech ds studenteläbe abgwöhne! Mir si chli niidischsch we mer vo angerne athlete ghöre wi guet iri ungerkunft isch.